Të gjitha shenjat tregojnë shërim: Në prill pas tre vitesh mungesë Portugalia u kthye në tregun e kapitaleve. Në maj vendi doli nga ombrella europiane e shpëtimit dhe në qershor qeveria portugeze bëri të ditur se do të heqë dorë nga kësti i fundit i kredisë ndihmëse të BE dhe FMN. Por tani pati një kthim mbrapa: Banka Espírito Santo (BES), banka private më e madhe në vend, kërcënohet nga kolapsi. Për hapjen e një banke të re dhe daljen nga kriza, qeveria i ka akorduar 4,4 miliard euro ndihmë bankës. Këto janë para nga paketa e ndihmës së BE, FMN dhe Bankes Qendore Europiane. Nga 12 miliard euro, 6,4 kanë mbetur ende pa u përdorur. “Natyrisht që kjo është një goditje për Portugalinë, sepse i duhet të shpëtojë një bankë”, thotë për DW Holger Schmieding, kryeekonomisti i Berenberg Bank. Vendi nuk mund të përballojë këtë goditje: “E rëndësishme është që Portugalia ta zgjidhë shpejt dhe energjitikisht këtë problem. Në mënyrë që të mos ketë ndikim tek ekonomia e vendit.”